...tumayo sa sarili kong paa |
"Ako ay OFW dahil sa kagustuhan kong tumayo sa aking sariling mga paa at sa paghahangad din na matupad ang pinapangarap na marangyang buhay”
ANO ANG BUHAY MO SA PILIPINAS NOON?
Lumaki ako na may masayang
pamilya, kumakain ng 3-5 na beses sa isang araw, nakukuha ang bawat magustuhan
na bagay damit laruan at iba pa, may kungkretong bahay kami sa probinsya,
nakapagtapos ng pag-aaral na hindi inisip kung papano magkakaroon ng
pangmatrikula sa eskwela, at nakapagtrabaho naman kaagad pagkatapos ko matapos
ang kurso ko sa kolehiyo . Sa makatuwid wala na akong hihilingin pa lahat ay
nandyan na.
ANONG
NAGTULAK SA'YO NA MANGIBANG BANSA?
Nasabi ko nga wala na ako
hihilingin pa sa buhay ko pero bakit ako nagpasya na mangibang bansa? Ito ay dahil
siguro na rin sa kulturang pinoy lahat tayo ay nangangarap na mangibang bansa
upang kumita ng higit pa sa kikitain natin sa Pilipinas lalo na kung wala naman
tayong negosyo sa pilipinas. Sa katunayan nga naranasan ko ang marangyang buhay
dahil sa aking Amang nangibang bansa. Isa pang dahilan ay sa kagustuhan ko ring tumayo sa sarili kong mga paa hanggang makamit ko ang pinapangarap kong
marangyang buhay na galing sa aking pinagpaguran.
PAANO KA NAPUNTA SA BANSANG PINAGTA-TRABAHUHAN
MO NGAYON?
Nagsimula
ang lahat sa isang munting pangarap na di ko akalain ay kaya ko plang
abutin. Marami akong pinagdaanan bago ko napagtagumpayan ang narating ko.
Maraming beses ako natalo sa laban ng buhay ko patungo sa tugatog ng
tagumpay. Maraming sakit at luha ang naging puhunan ko ngunit sa kabila ng
lahat naghari pa rin ang paniniwala ko na mkakamtan ko ang inaasam-asam ko sa
tulong na rin ng inspirasyon ko sa buhay ang aking pamilyang naniniwalang
mapapagtagumpayan ko itong laban na ito. Sila ang nagsilbing taga hilom
sa mga sakit na naransan ko at hugutan ng lakas ng loob upang hindi sumuko sa
laban. Higit sa lahat ang Panginoong Diyos ay nandyan siya ang naging tanglaw
ko patungo sa tugatog ng tagumpay. Dahil na rin siguro sa kinamulatan ko nun
bata pa ako ano man ang gustuhin ko nakukuha ko kaya siguro ganon nalang ako
kadeterminado na makapangibang bansa. Sabi nga nila “Pag may tiyaga may
nilaga”.
ANO ANG BUHAY MO SA KASALUKUYAN?
Masaya! Yan na siguro ang pinaka
saktong salita na makakapaglarawan ng buhay ko sa kasalukuyan. Nakamit ang
pinangarap na trabaho, may maayos na sweldo, nakakatulong sa pamilya at mga
kamag-anak, napapadpad sa iba’t ibang bansa, patuloy na dumadami ang
kaibigan, at napakasarap sa pakiramdam dahil iniidolo ako ng mga kapatid
ko at mga kaibigan kong nais din makamit ang tagumpay na nakuha ko. Binata pa
naman ako sa ngayon kaya ganyan ang istilo ng pamumuhay ko.
MAY PAGSISISI KA BA SA PAGIGING OFW?
Wala
akong pinagsisisihan sa pagiging OFW dahil ito ay matagal ko nang ninais na
makamtan. Masarap sa pakiramdam ang nakamit ang tagumpay lalo na’t ito’y
pinagsikapan mo at walang tumulong sayo. Kahit malayo sa pamilya at nakagisnang
buhay sa Pilipinas.
PAANO KA NAKAKA COPE-UP SA KALUNGKUTAN?
Isa sa mga katangian ko ay ang
nakakakilos at nakakapamuhay ng mag-isa . Mababaw lang naman ang
kaligayahan ko parati lang ako nasa bahay makaramdam man ng lungkot
nakakapamasyal ako mag-isa, nkakapanood ng sine mag-isa at nakakakain
mag-isa. Isa sa mga pinaghuhugutan ko ng lakas ng loob sa kasalukuyan ay
ang aking mga kaibigan simula nun dumami ang mga kaibigan ko dito sa bansang
kinalalagyan ko mas lalo ako naging masaya nandyan sila para patawanin ka at
damayan ka. Sa makatuwid nagkaroon ako ng pangalawang pamilya.
HANGGANG KELAN KA MAGIGING OFW?
Syempre hindi rin naman pang habang
buhay ang pagiging OFW. Para sa akin pag nakaipon na ako ng sapat para sa
pangarap kong bahay at negosyo tsaka ko babalikan ang Pilipinas. Pinakamatagal
na siguro ang walo hanggang sampung taon sa kasalukuyan halos nakakatatlong
taon na ko sa pagiging OFW.
ANO
ANG PLANO MO PAGNAG FOR GOOD KA NA SA PILIPINAS?
Magkaroon ng negosyo at sariling bahay
ang pinaplano kong ipundar pag-uwi ko ng Pilipinas. Ito ang pangalawa sa
malaking pangarap ko sa buhay.
ANO
ANG PINAKA DI MO MALILIMUTANG KARANASAN SA PAGIGING OFW?
Una sa lahat ay ang pakikisalamuha at
pakikisama sa mga iba’t ibang lahi na nanggaling sa iba’t ibang bansa. At
higit sa lahat ay mga pagkakataon na nakakabyahe sa iba’t ibang bansa.
ANO ANG
MAIPAPAYO MO SA KAPWA MO OFW?
Sa mga kapwa ko mga OFW
una sa lahat ay pahalagahan natin ang mga biyayang natatanggap natin. Wag
nating kalimutan na lumingon sa ating pinang-galingan lalo na sa ating mga
magulang na nagtaguyod sa atin. Sana rin ay wag nating tapakan ang mga kapwa
Pilipino na nakakasalamuha natin sa mga bansang kinalalagyan natin. Magkaisa
tayo mga kabayan. At higit sa lahat irespeto natin ang pamilya ng bawat isa wag
sana nating sirain ang pamilya ng ibang mga Pilipino. Di na po ako magpapaligoy
ligoy pa nanawagan po ako sa mga nagpapanggap na binata at dalaga kayo ang
pinatutungkulan ko magkaroon po sana tayo ng takot sa Diyos. Pagyamanin ninyo
ang sarili ninyong pamilya.
HENDRIX PELOVELLO, QATAR AIRWAYS |
No comments:
Post a Comment